Yangiliklar

Oʻzsanoatqurilishbank tizimida mijozlarga qator qulayliklar yaratildi

Joriy yilning 1-fevral kuni Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Oʻzsanoatqurilishbank strategik faoliyatining 2022-yil yakunlariga bagʻishlangan brifing oʻtkazildi.

Prezidentimizning 2020-yil 12-maydagi “2020-2025-yillarga moʻljallangan Oʻzbekiston Respublikasining bank tizimini isloh qilish strategiyasi toʻgʻrisida”gi farmonida davlat ulushi mavjud tijorat banklarini kompleks transformatsiya qilishga qaratilgan qator vazifalar belgilangan.

Oʻzsanoatqurilishbank tomonidan tizimning barcha yoʻnalishlarini tubdan isloh qilish ishlari bosqichma-bosqich amalga oshirilmoqda.

Brifingda taʼkidlanganidek, 2022-yilda Bank tizimida Xalqaro moliya korporatsiyasi hamda Yevropa tiklanish va taraqqiyot banki ekspertlari koʻmagida mijozlarga xizmat koʻrsatishda qator qulayliklar yaratildi.

Tarmoqlararo operatsiyalar yagona bank kodiga oʻtkazildi, front-ofislar ixcham sotuv nuqtalariga aylantirildi. Korporativ biznes yoʻnalishida 3 turda, kichik va oʻrta biznes yoʻnalishida 12 turda, aholi uchun esa, 18 turdagi yangi mahsulot va xizmatlar joriy qilindi.

Tadbirkorlarga moʻljallangan “SQB Business” dasturi, mijozlarni mobil ilova yordamida masofadan turib identifikatsiya qilish tizimi ishga tushirildi. Bankning Aloqa markazi orqali ham xizmat va mahsulotlar sotuvi yoʻlga qoʻyildi.

Plastik kartalar soni qariyb 2 mln. donaga, terminallar 33,8 mingtaga, bankomat va infokiosklar 475 taga yetkazildi. 24/7 rejimida ishlayotgan shoxobchalar soni yuzdan oshdi. 2022-yilda xoʻjalik subyektlari va aholiga ajratilgan kreditlar soʻnggi yillarga nisbatan eng yuqori koʻrsatkichga chiqib, 21 trln. soʻmni tashkil etdi.

Hisobot davrida 582 mln. dollar qiymatda xorijiy kredit liniyalar jalb qilindi. Kredit qarzdorliklari bilan ishlash tizimining xalqaro standartlari asosida tashkil qilinishi (“Soft-Collection” tizimi) hisobiga ularni undirish samaradorligi 10 foizdan 34 foizga oshdi.

Yangicha ish uslubida Oʻquv va IT markazi foydalanishga topshirildi. Xodimlarni ragʻbatlantirishning KPI tizimi yoʻlga qoʻyildi. Skolkovo Moskva boshqaruv maktabi bilan hamkorlikda xodimlarni oʻqitish ishlari boshlandi.

Mazkur amalga oshirilgan ishlar natijasida muassasa faoliyati yanada barqarorlashdi, moliyaviy koʻrsatkichlari sezilarli darajada oʻsdi. Bu mahalliy va xalqaro tashkilotlar tomonidan alohida eʼtirof etildi, xalqaro reytinglari qayta tasdiqlandi (BB- darajada).

Xususan, 2022-yilda Bank aktivlari 14 foizga oshib, 64 trln. soʻmga, kredit qoʻyilmalari 11 foizga oʻsib, 48 trln. soʻmga, depozit bazasi 1,2 barobarga ortib, qariyb 15 trln. soʻmga yetdi.

Xalqaro moliya korporatsiyasi hamda Yevropa tiklanish va taraqqiyot bankidan keyinchalik ustav kapitaliga konvertatsiya qilinishi koʻzda tutilgan 125 mln. dollarlik kredit liniyalar jalb qilindi.

Korrupsiyaga qarshi kurashish menejment tizimining ISO 37001:2016 xalqaro standarti talablariga muvofiqlik sertifikati qoʻlga kiritildi.

“Euromoney” va “Asiamoney” kabi nufuzli xalqaro nashrlar tomonidan “2022-yilda Oʻzbekistonning eng ilgʻor banki” va “Oʻzbekistonning eng yaxshi yashil banki” deya eʼtirof etildi. Mahalliy miqyosda “Yilning eng yaxshi ish beruvchisi” mukofotiga sazovor boʻldi.

https://www.youtube.com/watch?v=bpxwY_3PAG4

Bank Axborot xizmati

Orqaga qaytish

502

Boshqa yangiliklar