“Oʻzsanoatqurilishbank” ATBning rasmiy munosabati

Ijtimoiy tarmoqlarda “Oʻzsanoatqurilishbank” ATB (SQB) xodimi tomonidan fuqarolardan kredit ajratib berish evaziga pul mablagʻlari talab qilinayotgani haqida xabar tarqaldi.

Ushbu xabar yuzasidan quyidagilar maʼlum qilinadi.

SQB tizimida korrupsiyaviy holatlarning oldini olish, xizmat vakolatlarini suiisteʼmol qilishga yoʻl qoʻymaslik hamda shaffoflikni taʼminlash masalalariga alohida eʼtibor qaratib kelinmoqda. Bankda korrupsiyaga qarshi kurashish boʻyicha ichki nazorat mexanizmlari joriy etilgan boʻlib, har bir murojaat belgilangan tartibda atroflicha oʻrganib chiqiladi.

Ayni paytda ijtimoiy tarmoqda tarqalgan xabar yuzasidan xizmat tekshiruvi oʻtkazilmoqda. Murojaat anonim tarzda qoldirilgani hamda unda aniq holatlar va manzilli maʼlumotlar keltirilmaganligi sababli qoʻshimcha oʻrganish ishlari olib borilmoqda, murojaat muallifi bilan aloqa oʻrnatish choralari koʻrilmoqda. Tekshiruv natijalariga koʻra qonunchilikda belgilangan tartibda tegishli qaror qabul qilinadi.

SQB korrupsiyaning har qanday koʻrinishiga nisbatan murosasiz munosabat tamoyiliga amal qiladi. Bank tizimi xodimlari tomonidan noqonuniy xatti-harakatlar sodir etilganligi tasdiqlangan taqdirda, aybdor shaxslarga nisbatan qatʼiy choralar koʻriladi.

Shu munosabat bilan, bank xodimlari tomonidan noqonuniy ravishda pul talab qilish holatlari boʻyicha aniq maʼlumot va dalillarga ega boʻlgan fuqarolardan bankning ishonch telefonlari yoki korrupsiyaga qarshi kurashish boʻyicha aloqa kanallari orqali murojaat qilishlarini soʻraymiz. Murojaat etuvchining shaxsi sir saqlanishi kafolatlanadi.

Ishonch telefoni: +998 78 777 11 80

Korrupsiyaga qarshi kurashish boʻyicha ishonch liniyasi: 0800 120 88 88

Telegram boti: @sqbantikor_bot

Orqaga qaytish

721

Boshqa yangiliklar