SQB Global Customer Choice Index 2026 xalqaro tadqiqoti natijalariga ko‘ra O‘zbekistonda eng yaxshi mijozlar tajribasini ta’minlovchi bank deb e’tirof etildi

“InteriseGroup” tadqiqot kompaniyasining “sirli xaridor” metodologiyasi asosida o‘tkazgan “Global Customer Choice Index 2026” tadqiqoti yakunlandi. Unda mamlakat moliya bozorining 26 ta oflayn tarmoqqa ega tijorat banki, 6 ta onlayn bank va 2 ta to‘lov tizimi ishtirok etdi. Natijalarga ko‘ra, SQB O‘zbekiston moliya tashkilotlari orasida 1-o‘rinni egallab, onlayn va oflayn kanallarda eng yaxshi umumiy mijozlar tajribasini ta’minlovchi bank deb e’tirof etildi.

Xolis baho qanday shakllandi?

“Sirli xaridor” metodologiyasining qimmati shundaki, bank o‘zini tadqiqot ob’ekti bo‘lganini bilmaydi. Mustaqil ekspertlar oddiy fuqaro sifatida filialga kiradi, navbatda turadi, mobil ilovadan foydalanadi, Aloqa markaziga qo‘ng‘iroq qiladi va har bir bosqichni oldindan belgilangan mezonlar bo‘yicha baholaydi. Shu bois tadqiqot natijasi hisobotlardagi raqamlarni emas, mijoz har kuni duch keladigan haqiqiy manzarani aks ettiradi.

Baholash sakkiz yo‘nalishni qamrab oldi: filiallar muhiti va qulayligi, jarayonlarning texnologik darajasi, servis sifati, xodimlarning jamoaviy hamkorligi, murojaatlarni hal qilish samaradorligi, raqamli kanallardan foydalanish qulayligi, Aloqa markazi va onlayn qo‘llab-quvvatlash faoliyati, shuningdek, barcha kanallar o‘rtasidagi o‘zaro uyg‘unlik.

SQBga ustunlik bergan jihatlar

Ekspertlar xulosasida bankning bir necha sifati alohida qayd etildi.

Avvalo, xizmat ko‘rsatish tarmoqlarida yaratilgan muhit e’tirof etildi. Zamonaviy jihozlangan markazlar mijozlarga qulay va shinam sharoit taqdim etadi. Xodimlarning professional xizmat ko‘rsatish madaniyati, har bir tashrif buyuruvchiga individual yondashuvi hamda tashqi ko‘rinishga bo‘lgan e’tibori bankning korporativ madaniyatini namoyon etadi. Kutish vaqtining qisqaligi esa xizmat ko‘rsatish sifati haqidagi ijobiy taassurotni yanada mustahkamlab, mijozlarda alohida e’tibor hissini uyg‘otadi..

Navbatdagisi – jarayonlarning texnologik puxtaligi. Ko‘plab operatsiyalar bank xizmatlarini ko‘rsatish tarmog‘iga bormasdan, masofadan amalga oshiriladi, ofisda esa rasmiyatchilik imkon qadar soddalashtirilgan.

Jamoaviy hamkorlik ham ekspertlar nazaridan chetda qolmagan. Mijoz masalasi bir xodimdan ikkinchisiga “ko‘chib yurmaydi”: murojaat qaysi nuqtada qabul qilingan bo‘lsa, o‘sha yerda yakunigacha hal etiladi. Aynan shu yondashuv muammolarni hal qilish samaradorligi bo‘yicha yuqori ballga asos bo‘ldi.

Nihoyat, kanallar o‘rtasidagi uyg‘unlik. Foydalanuvchi mobil ilovada boshlagan amaliyotini bank xizmatlarini ko‘rsatish tarmog‘ida davom ettirsa ham, Aloqa markaziga murojaat qilsa ham, bir xil darajadagi xizmatga duch keladi. Yagona servis standarti bank uchun shior emas, kundalik ish tartibi ekanini mustaqil baho yana bir bor tasdiqladi.

Izchil ishning tasdig‘i

SQB uchun mazkur muvaffaqiyat tasodif emas. Bank so‘nggi yillarda xizmat ko‘rsatish sifatini oshirish, raqamli yechimlarni joriy etish va barcha nuqtalarda yagona standartlarni ta’minlashga alohida e’tibor qaratib kelmoqda. Tashqi baholash mazkur sa’y-harakatlar mijoz darajasida sezilayotganini ko‘rsatdi.

Bankda ta’kidlanganidek, har bir mijozning ishonchi, har bir murojaat va har bir xizmat jarayoni alohida ahamiyatga ega. Shu bois servis sifati SQB faoliyatining asosiy ustuvor yo‘nalishlaridan biri bo‘lib qoladi. Bugungi natija esa bank uchun yakuniy manzil emas, u mijoz ishonchini har kuni qayta qozonish zaruratini yana bir bor eslatuvchi mezondir.

Ma’lumot uchun: Interise Group mijozlar tajribasi va servis sifatini baholash sohasida 19 yillik tajribaga ega xalqaro tadqiqot kompaniyasi bo‘lib, 10 ta mamlakatda 264 ta kompaniya ishtirokida tadqiqotlar o‘tkazgan hamda 5 mingdan ortiq “sirli xaridor” tashriflarini amalga oshirgan.

Orqaga qaytish

44

Boshqa yangiliklar