Bank xodimlari “O‘zbekiston – 2030” strategiyasi va 2024 yilga mo‘ljallangan Davlat dasturi ijrosi bilan tanishdi

Bugungi kunda joylarda “O‘zbekiston – 2030” strategiyasi va 2024-yilgi Davlat dasturi ijrosi ustidan monitoring va jamoatchilik nazoratini tashkil etish, shuningdek ularning maqsad va vazifalarini keng jamoatchilikka yetkazishga qaratilgan targ‘ibot tadbirlari tashkil etilmoqda. O‘zsanoatqurilishbank Bosh ofisidagi ana shunday tadbir Oliy Majlis Qonunchilik palatasi deputatlari ishtirokida bo‘lib o‘tdi.

“O‘zbekiston – 2030” strategiyasi mamlakatimiz rivojining muhim fundamental asoslarini o‘zida qamragan muhim hujjatdir. Unga ko‘ra, iqtisodiyotni barqarorlashtirish, ijtimoiy sohalarni xalqaro standartlarga muvofiqlashtirish, qonun ustuvorligi va xavfsizlikni ta’minlash, shuningdek, ekologik sharoitlarni yaxshilash borasida aniq maqsad va vazifalari belgilangan.

Prezidentimizning 2024-yil 21-fevraldagi “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi to‘g‘risida”gi farmonida ham jamiyatimizning barcha qatlamlari manfaatlariga xizmat qiluvchi muhim chora-tadbirlar nazarda tutilgan.

Tadbirda ushbu hujjatlar mohiyatan zamonaviy davlat, adolatli jamiyat hamda farovon hayotni barpo etishga qaratilgani ta’kidlandi, islohotlarning bank-moliya sohasidagi aksi xususida so‘z yuritildi.

– So‘nggi yillarda bank xizmatlarini yetkazib berishda katta o‘zgarishlar bo‘ldi, – deydi Oliy Majlis Qonunchilik palatasi Sanoat, qurilish va savdo masalalari qo‘mitasi raisi, iqtisod fanlari doktori, professor Nodir Jumayev. – Raqamli texnologiyalar va moliya bozoridagi raqobat banklarni xalqqa yanada yaqinlashtirdi. Bugun u tadbirkor yoki oddiy inson bo‘lsin bank xizmat va mahsulotlaridan hayotiy zarurat sifatida foydalanmoqda. “Bank mijoz uchun” shiori amalda o‘zini namoyon qila boshladi.

Tadbirda O‘zsanoatqurilishbank tizimida yoshlar va biznesni qo‘llab-quvvatlash borasida olib borilayotgan ishlar yuzasidan taqdimot namoyish etildi.

Ta’kidlanganidek, bugungi kunda bank tomonidan yoshlarni tadbirkorlikka jalb qilish, ularning startap loyihalarini qo‘llab-quvvatlash, shuningdek oliy ta’lim muassasalarida tahsil olishida ko‘maklashish maqsadida “Yosh tadbirkor” va “Ta’lim” kredit mahsulotlari taklif etilmoqda.

Joriy yilning 1-iyul holatiga ko‘ra, “Yosh tadbirkor” kredit turi bo‘yicha qariyb 40 mlrd. so‘m miqdorida kredit ajratilib, natijada yoshlarning bir necha o‘nlab startap va istiqbolli loyihalari tadbiq etildi, 800ga yaqin ish o‘rni yaratildi.

“Ta’lim” krediti asosida esa, 18 700ga yaqin yigit-qizlarning jami 234 mlrd. so‘mdan ziyod to‘lov-kontrakt pullari to‘lab berildi.

– Bundan tashqari, bankimiz tomonidan Prezidentimiz tashabbusi bilan ilgari surilgan buyuk ma’rifatparvar olim Is'hoqxon Ibrat nomini abadiylashtirishga qaratilgan “Ibrat farzandlari” loyihasi ham moliyaviy qo‘llab-quvvatlab kelinmoqda, – deydi “O‘zsanoatqurilishbank” ATB boshqaruv raisi o‘rinbosari Sanjar Abduvaliyev. – Bugungi kunda ushbu loyiha asosida minglab yigit-qizlar 20dan ortiq xorijiy tillarni onlayn tarzda bepul o‘rganishga muvaffaq bo‘lmoqda.

Tadbirda Zoom platformasi orqali bankning hududiy boshqarmalaridan ham xodimlar ishtirok etdi.

Bank Axborot xizmati

Orqaga qaytish

1577

Boshqa yangiliklar