Yangiliklar

SQB xalqaro kapital bozoridagi yirik bitimi uchun “GlobalCapital” mukofotiga sazovor bo‘ldi

O‘zsanoatqurilishbank (SQB) xalqaro moliya bozorlaridagi faol ishtiroki hamda zamonaviy moliyaviy instrumentlarni joriy etishdagi innovasion yondashuvi natijasida nufuzli “GlobalCapital” xalqaro nashri tomonidan “Central and Eastern Europe (CEE) Deal of the Year” – “Markaziy va Sharqiy Yevropa yil bitimi” nominatsiyasida g‘olib deb topildi.

“GlobalCapital” xalqaro kapital bozorlari, qarz va aksiyaviy instrumentlar bo‘yicha tahliliy materiallari bilan tanilgan yetakchi moliyaviy nashrlardan biri hisoblanadi. Mazkur mukofot yuqori raqobat sharoitida, qat’iy tanlov hamda mustaqil ekspertlar baholovi asosida taqdim etiladi.

Ta’kidlash joiz, O‘zsanoatqurilishbank ushbu yutuqqa sazovor bo‘lgan O‘zbekistondagi ilk korporativ moliya instituti bo‘ldi. Bu e’tirof Bank tomonidan 2025-yil oktyabr oyida London fond birjasida joylashtirilgan 300 million AQSh dollari miqdoridagi birinchi darajali qo‘shimcha kapital (AT1) xalqaro obligatsiyalari emissiyasi natijasida qo‘lga kiritildi.

Ushbu emissiya nafaqat O‘zbekiston, balki Markaziy Osiyo mintaqasida amalga oshirilgan ilg‘or tajriba sifatida e’tirof etildi. Bitim doirasida Citibank, J.P. Morgan, Mashreqbank, Raiffeisen Bank, Societe Generale va Standard Chartered kabi jahonning yetakchi moliyaviy institutlari bukrannerlar sifatida ishtirok etdi.

“GlobalCapital” tahliliga ko‘ra, bitim murakkab global moliya bozorlari sharoitida, investorlar ehtiyotkorligi ortib borayotgan bir davrda amalga oshirilganiga qaramasdan, yuqori talab bilan ajralib turdi. Joylashtirish jarayonida shakllangan buyurtmalar hajmi emissiya miqdoridan 4 barobardan ziyod bo‘ldi. Bu esa investorlarning nafaqat O‘zsanoatqurilishbankka, balki umuman O‘zbekiston moliya tizimiga bo‘lgan ishonchi mustahkam ekanini yana bir bor tasdiqladi.

“GlobalCapital” mukofoti O‘zsanoatqurilishbankning xalqaro moliya bozorlaridagi obro‘-e’tibori, institusional salohiyati hamda strategik rivojlanish yo‘nalishlari to‘g‘ri tanlanganini namoyon etadi. Shuningdek, u kelgusida yangi investorlarni jalb etish, uzoq muddatli hamkorlikni kengaytirish va yirik kapital operatsiyalarini amalga oshirish uchun mustahkam poydevor yaratadi.

Ma’lumot uchun: “GlobalCapital” nashri talqiniga ko‘ra, CEE (Central and Eastern Europe) mintaqasiga Polsha, Vengriya, Chexiya, Ruminiya, Bolgariya, Bolqon yarim oroli davlatlari, Boltiqbo‘yi mamlakatlari hamda MDH davlatlari kiradi.

Вернуться назад

671

Другие новости