Yangiliklar

Energiya samaradorlik: bank va aholi o‘rtasida ochiq muloqot

O‘zsanoatqurilishbank tomonidan Surxondaryo viloyatida “yashil” binolar ahamiyati hamda yakka tartibdagi aholi xonadonlarida energiya samaradorlikni oshirishga qaratilgan tadbir tashkil etildi.

Mazkur tadbir Prezidentimizning 2025-yil 11-mart kuni qabul qilingan “Uy-joy hamda bino-inshootlarni issiqlik energiyasi bilan ta’minlash sohasini tubdan isloh qilish hamda binolarning energiya samaradorligini oshirish chora-tadbirlari to‘g‘risida”gi qarori ijrosi doirasida o‘tkazildi. Qarorda kelgusi 5-yilda markazlashgan issiqlik ta’minoti qamrovini 37 foizdan 58 foizgacha kengaytirish, tizimdagi yo‘qotishlarni esa 38 foizdan 20 foizgacha qisqartirish belgilangan.

Tadbir doirasida Surxondaryo viloyatida bankka biriktirilgan tumanlar aholisi va tadbirkorlar bilan uchrashuv tashkil etildi. Unda qaror mazmun-mohiyati, “yashil” binolar va yakka tartibdagi uylarda energiya samaradorlikni oshirishning ahamiyati haqida atroflicha tushuntirishlar berildi. Ishtirokchilar nazariy ma’lumotlar bilan birga, amaliyotda qo‘llash mumkin bo‘lgan tavsiyalar bilan ham tanishdi.

– 2019-2030-yillarga mo‘ljallangan “yashil” iqtisodiyotga o‘tish strategiyasi tasdiqlanganidan so‘ng, mamlakatimizda ekologik toza va resurs tejamkor texnologiyalarga talab orta boshladi, – deydi “O‘zsanoatqurilishbank” ATB “Green banking” departamenti direktori Bobur Sultonmurodov. – Xususan, yangi qurilayotgan ko‘p qavatli va yakka tartibdagi uy-joylar, “yashil” bino-inshootlarda “yashil” mezonlarga mos texnologik asbob-uskunalar, qurilmalar va materiallar keng qo‘llanilmoqda. Bunday uchrashuvlarda biz yurtdoshlarimizga ushbu imkoniyatlarni amaliy misollar bilan tushuntirib, ularni samarali foydalanishga undayapmiz.

Tadbirda shuningdek, bankning “yashil” kredit mahsulotlari haqidagi taqdimot ham namoyish etildi. Bu kreditlar orqali aholi va tadbirkorlar energiya tejovchi qurilmalarni xarid qilish hamda uy-joylarini zamonaviy talablar asosida ta’mirlash imkoniyatiga ega bo‘ladi.

Bank axborot xizmati

Вернуться назад

1259

Другие новости