Yangiliklar

O‘zsanoatqurilishbank 15 ta kutubxona barpo etib, foydalanishga topshirdi

03.05.2024 18:02

Oʻzsanoatqurilishbank tomonidan poytaxtimizdagi 15 ta mahallada zamonaviy kutubxonalar barpo etilib, foydalanishga topshirildi.

Yurtimiz azaldan ilm-maʼrifat markazi boʻlgan. Samarqand, Buxoro, Xiva, Qoʻqon shaharlaridagi hukmdorlar saroylarida yirik kutubxonalar faoliyat yuritgan. Asrlarki davom etayotgan ushbu anʼanaga Prezidentimiz rahnamoligida tashkilot va muassasalar ham hissa qoʻshmoqda.

Oʻzsanoatqurilishbank tashabbusi bilan Toshkent shahrining Mirzo Ulugʻbek tumanidagi “Ahillik” va “Alisherobod”, Olmazor tumanidagi “Nihol”, Uchtepa tumanidagi “Zargarlik” va “Diyorobod”, Chilonzor tumanidagi “Boʻshqoʻrgʻon” va “Qatortol”, Shayxontohur tumanidagi “Bogʻ koʻcha”, Sergeli tumanidagi “Nilufar”, Mirobod tumanidagi “Tong yulduzi”, Yakkasaroy tumanidagi “Belariq”, Yashnobod tumanidagi “Oʻqchi olmazor”, Yunusobod tumanidagi “Akbarobod”, Gʻayratiy va Uvaysiy nomli mahallalarda zamonaviy kutubxonalar bunyod etildi.

Kutubxonalar fondi jami 16 ming dona kitobdan iborat. Ularning har biri esa, mingdan ziyod milliy va xorijiy adabiyotlar bilan boyitildi.

– Mahallamizda yoshu qarining quvonchi cheksiz, – deydi Yunusobod tumanidagi “Akbarobod” mahalla fuqarolari yigʻini raisi Abduvohid Xoʻjayev. – Ayniqsa, kutubxonaga oshiqib kirib kelayotgan oʻgʻil-qizlarimizni koʻrib koʻnglimiz yorishib ketayapti. Ular bu yerda oʻqigan asarlari boʻyicha bir-birlari bilan fikr ham almashmoqda. Yana bir eʼtiborli jihati, kutubxonalar maktab oʻquvchilarining ayni yozgi taʼtili oldi tashkil etildi. Endilikda ota-onalar farzandlarini boʻsh vaqtida kutubxonaga jalb qiladigan boʻldi. Kitobsevarlar uchun esa, kitob xarid qilishga yohud vaqt va yoʻlkira sarflab kutubxonaga borishga hojat qolmadi.
Kutubxonalarda, shuningdek, kitoblarni munosib saqlash va bir paytning oʻzida 150 nafar kitobxonga sifatli xizmat koʻrsatish uchun barcha sharoitlar yaratildi. 15 nafar kutubxonachi ishga jalb qilindi.

– Men uchun kitob – bu xolis doʻst, murabbiy, qalbimga xalovat va zavq beruvchi tengsiz bilim manbai, – deydi Chilonzor tumani “Boʻshqoʻrgʻon” mahallasidagi kitobxonlardan biri Odina Maxramova. – Mutolaa har kungi hayot tarzimdan oʻrin olgan. Aynan muqovali, qogʻozga chop etilgan kitoblarni oʻqishni yoqtirganim bois mahallamizda kutubxona ochilganidan juda sevindim. Buyuk asarlarni oʻqish – saodat. Ana shunday baxtdan bahra olayotgan tengdoshlarimga xayrli mutolaa tilash barobarida, ularni yangi kutubxonamizga chorlab qolaman.

Bank Axborot xizmati

Вернуться назад