Yangiliklar

Qashqadaryo viloyatida qurilish materiallari ishlab chiqaruvchilar bilan uchrashuv o‘tkazildi

Qashqadaryo viloyatida O‘zsanoatqurilishbank, “O‘zsanoatqurilishmateriallari” uyushmasi hamda Savdo-sanoat palatasi hamkorligida qurilish materiallari ishlab chiqaruvchi korxonalar vakillari bilan uchrashuv o‘tkazildi.

Tadbir Prezidentimiz rahbarligida o‘tgan yil 23-sentyabrda qurilish industriyasi va qurilish materiallari tarmog‘ini rivojlantirish chora-tadbirlari muhokamasiga bag‘ishlab o‘tkazilgan videoselektor yig‘ilishida berilgan topshiriqlar ijrosi doirasida tashkil etildi.

“O‘zsanoatqurilishbank” ATB Boshqaruv raisi o‘rinbosari Farrux Abdurahmonov va boshqa mutasaddilar ishtirokidagi ochiq muloqotda tadbirkorlarni qiynayotgan tizimli muammolar tinglanib, yechimi yuzasidan vazifalar belgilab olindi.

Importbop mahsulotlarni ishlab chiqarishga qaratilgan yangi loyihalarni ishga tushirish, korxonalarni modernizatsiya qilish, xususan, “yashil” texnologiyalarni o‘zlashtirib, energiya samaradorlikni oshirishga borasida taklif va tavsiyalar berildi.

Ma’lumot o‘rnida aytish joiz, bugungi kunda viloyatda qurilish materiallari ishlab chiqarish sohasida 650 ga yaqin tadbirkorlik subyektlari faoliyat yuritadi. 2024-yilda ushbu korxonalar tomonidan 2,6 trln so‘mlik mahsulot ishlab chiqarilgan. Bu ko‘rsatkich hududdagi sanoat mahsulotlari hajmi (39,5 trln so‘m)ning 6,6 foizini tashkil etadi.

Bank axborot xizmati

Orqaga qaytish

543

Boshqa yangiliklar