Yangiliklar

Maqsad - jahon bozoridan mustahkam joy olish

Oʻzsanoatqurilishbank tomonidan hududlarda tashkil etilayotgan press-tur Fargʻona viloyatida ham oʻtkazildi. U yerda jurnalistlar yirik paxta-toʻqimachilik klasteri – “Fergana global textile” faoliyati bilan tanishdi.

Yurtimizda toʻqimachilik tarmogʻini yangicha surʼatda rivojlantirish, kelgusi yilda 5 milliard dollarlikdan ziyod eksport qilish choralari koʻriladi. Bu borada Prezidentimiz raisligida joriy yilning 7-noyabr kuni mahalliy sanoatni rivojlantirish masalalari boʻyicha oʻtkazilgan videoselektor yigʻilishida mutasaddilarga vazifalar topshirildi. Yevropa davlatlari, Turkiya, Misr, Marokashga gazlama va trikotaj mato eksporti uchun transport xarajatlarining 70 foizi qoplab berilishi taʼkidlandi.

Bu, oʻz navbatida, yirik eksportyor – “Fergana global textile” kabi korxonalar uchun yanada keng imkoniyat yaratadi.

– Albatta, biz tadbirkorlar sohaga oid har bir islohotdan katta manfaat koʻramiz, qulayliklar, imtiyozlardan ruhlanib, yangi ishlarga qoʻl uramiz – deydi “Fergana global textile” masʼuliyati cheklangan jamiyati rahbari Moʻminjon Razzoqov. – Korxonamizning klaster darajasiga chiqishi ham hukumatimiz tomonidan sohaning qoʻllab-quvvatlovi ostida yuzaga keldi. Maqsadimiz yuqori malakali mutaxassislar va zamonaviy texnologiyalarga tayanib, sifatli mahsulot hamda benuqson xizmatimiz bilan jahon toʻqimachilik bozorida yetakchilikni qoʻlga kiritishga qaratilgan.

Korxona dastavval toʻqimachilik fabrikasi tarzida tashkil etilgan. Hudud fermerlaridan paxta tolasi sotib olinib, uni yigirish, boʻyash va toʻqish bilan shugʻullangan.

Bugungi kunda fabrika yirik klasterga aylandi. U yerda mingga yaqin hudud aholisi ish bilan taʼminlandi. 13 ming gektardan ziyod paxta yetishtirish maydoni, paxta tozalash, tolasini yigirish, boʻyash va toʻqish zavodlari, shuningdek, laboratoriya hamda standartlashtirish markazlari mavjud.

– “Fergana global textile” viloyatdagi eng istiqbolli korxonalardan biri, – deydi Oʻzsanoatqurilishbankning Fargʻona mintaqaviy Bank xizmatlari ofisi boshligʻi Baxtiyor Nuritdinov. – Tashkil etilganidan buyon bankimiz bilan hamkorlikda 4 ta loyiha amalga oshirildi. Dastlabki ikkita loyiha boʻyicha xorijiy kredit liniyasi hisobidan Shveysariya, Germaniya, Italiya, Turkiya davlatlaridan ilgʻor toʻqimachilik dastgohlari hamda texnologiyalar olib kelishga koʻmaklashildi. Joriy yil boshidan buyon esa, yana ikki marta kredit chiqarilib, paxta xom ashyosini yetishtirish bilan bogʻliq xarajatlari moliyaviy qoʻllab-quvvatlandi.

Ayni paytda klaster tomonidan bir yigʻim-terim mavsumida 40 ming tonnadan ziyodroq hosil olinmoqda. Yigiruv fabrikasida kuniga 35 tonna, trikotaj matolar boʻyicha 20 tonna, boʻyash sexida esa 30 tonna maxsulotlar ishlab chiqarilmoqda.

Eksport geografiyasi Italiya, Ispaniya, Germaniya, Portugaliya, Marokash, Turkiya, Xitoy, Polsha, Misr, BAA, Bangladesh, Moldova, Pokiston hamda MDH davlatlarini oʻz ichiga oladi. Bu boradagi koʻrsatkich joriy yilning 1-dekabr holatiga koʻra, 45 mln. AQSH dollaridan ortdi.

Press-tur davomida jurnalistlar toʻqimachilik sanoati majmuasidagi uch toifada ishlab chiqarilayotgan turli iplar, boʻyalgan trikotaj va bosma mato mahsulotlari xususiyatlari haqida mutaxassislardan batafsil maʼlumot oldi.

Shundan soʻng, anʼanaga koʻra, Oʻzsanoatqurilishbankning Fargʻona mintaqaviy bank xizmatlari ofisida matbuot anjumani ham oʻtkazildi. Unda transformatsiya ishlaridan keyin bank tarmogʻidagi oʻzgarishlar haqida soʻzlab berildi.

– Mijozga yoʻnaltirilgan tamoyil asosidagi ishlar koʻlami keng, – deydi ofis boshligʻi Baxtiyor Nuritdinov. – Birgina tadbirkorlar bilan ishlashda ularni yirik (korporativ), oʻrta va kichik segmentlarga boʻlib, masʼul xodimlar (mijoz menejeri) oʻrtasida taqsimlaganmiz. Menejerlar har bir mijoz kesimida reja ishlab chiqib, ular bilan individal ishlamoqda. Xususan, korxona rahbarlari bilan yakka holda muzokaralar olib borsa, ishchi-xodimlari uchun alohida uchrashuvlar oʻtkazadi. Bir obyektda har ikki maqomdagi mijozlar bilan paralell ishlash usuli tizimda bank xizmatlari ommalashuvini oshirishga katta xizmat qilmoqda.

Taʼkidlanganidek, joriy yilning 1-dekabr holatiga koʻra, bankning Fargʻona mintaqaviy bank xizmatlari ofisi tomonidan yuridik va jismoniy shaxslarga koʻrsatilgan xizmatlar oʻtgan yilning shu davriga nisbatan 2 baravarga oʻsgan. 55 ta loyihani moliyalashtirish maqsadida 510,3 mlrd. soʻm miqdorida kredit ajratilgan. Buning hisobiga 360dan ziyod ish oʻrni yaratilgan.

Shuningdek, hisobot davrida muassasa kredit portfeli 1 805,68 mlrd. soʻmni, aholi va xoʻjalik subyektlaridan jalb qilingan omonatlar 5,1 mlrd. soʻmni tashkil etgan. Real foydasi taqqoslanayotgan davrga nisbatan 1,2 baravarga oshgan.

Bank Axborot xizmati

Orqaga qaytish

473

Boshqa yangiliklar